स वा एष एतस्मिन् स्वप्नान्ते रत्वा चरित्वा ..

[अवस्थात्रयनियामकः भगवानेव ]

उपनिषत्

स वा एष एतस्मिन् स्वप्नान्ते रत्वा चरित्वा दृष्ट्वैव पुण्यं च पापं च पुनः प्रतिन्यायं प्रतियोन्या द्रवति बुद्धान्तायैव

॥ ३४ ॥

भाष्यम्

सर्वदा जीवमादाय नियमाद्विष्णुरेव हि ।

जाग्रदादिषु संयाति नान्यथा तु कथञ्चन ॥

एवं नियमविज्ञप्त्यै जीवास्वातन्त्र्यवित्तये ।

परीवृत्तिमवस्थासु साभ्यासा बक्ति हि श्रुतिः ॥ इति निर्णये ॥

अतस्तात्पर्यार्थं पुनर्वचम् ।

भावबोधटिप्पणी

ननु स वा एष एतस्मिन्निति पूर्वोक्तमेव पुनः किमर्थमुच्यत इत्यतस्तत्र प्रमाणमुदाहृत्य पुनर्वचनकृत्यमाह - सर्वदेति ।। एवं नियमविज्ञप्तिरपि किमर्थेत्यत उक्तम् || जीवेति ॥ परिवृत्तिं परिवर्तनम् ॥ ३४ ॥